کراچی (ڈیلی پاکستان آن لائن): صوبہ سندھ میں ایک بار پھر ایم پاکس (Mpox) وائرس کے کیسز سامنے آنے کا سلسلہ شروع ہو گیا ہے، جہاں حالیہ رپورٹ ہونے والے کیسز میں سے 3 کی تصدیق کر دی گئی ہے۔
اسپتال میں رپورٹ ہونے والے کیسز کی تفصیلات: محکمہ صحت کے ذرائع کے مطابق کراچی کے سندھ انفیکشن ڈیزیز ہسپتال (نیپا) میں ایم پاکس کے کل 4 کیسز رپورٹ ہوئے جن میں سے 3 کی پی سی آر ٹیسٹ رپورٹس میں بیماری کی تصدیق ہو چکی ہے جبکہ ایک مشتبہ مریض کی رپورٹ کا انتظار کیا جا رہا ہے۔ ان تصدیق شدہ کیسز میں سے 2 کا تعلق اندرونِ سندھ (جن میں ایک باپ اور بیٹی شامل ہیں) جبکہ ایک کا تعلق کراچی کے علاقے فیڈرل بی ایریا سے ہے، جس کی عمر 46 سال بتائی گئی ہے۔
ان نئے کیسز کے سامنے آنے کے بعد رواں سال کے دوران سندھ بھر میں ایم پاکس کے کل تصدیق شدہ کیسز کی تعداد 39 جبکہ صرف کراچی میں یہ تعداد 13 تک پہنچ گئی ہے۔
ایم پاکس کی علامات اور پھیلاؤ کی وجوہات: طبی ماہرین کا کہنا ہے کہ ایم پاکس ایک وائرل بیماری ہے جس کا تعلق چیچک کے خاندان سے ہے۔ اس بیماری کی نمایاں علامات میں جسم پر دانے اور دردناک یا خارش والے زخم بننا، تیز بخار، سر اور جسم میں شدید درد، کمزوری اور گردن، بغل یا رانوں کے غدود کا ابھرنا شامل ہیں۔ یہ دانے عموماً چہرے، ہاتھوں، پاؤں، منہ اور گلے پر ظاہر ہوتے ہیں جبکہ انفیکشن کے بعد علامات ظاہر ہونے میں 21 دن تک کا وقت لگ سکتا ہے۔
ماہرین کے مطابق یہ وائرس متاثرہ شخص کے ساتھ قریبی جسمانی رابطے، اس کے زخموں یا جلد سے براہِ راست تعلق، اور مریض کے استعمال کردہ کپڑوں، تولیوں یا بستر کے استعمال سے تیزی سے پھیل سکتا ہے۔
احتدابی تدابیر اور ماہرین کی ہدایات: ماہرین صحت نے شہریوں کو ہدایت کی ہے کہ ایم پاکس سے بچاؤ کے لیے متاثرہ شخص سے قریبی رابطے سے گریز کیا جائے۔ مریض کو صحت یابی تک مکمل آئسولیشن (تنہائی) میں رکھا جائے، بار بار ہاتھ دھونے کی عادت اپنائی جائے اور آلودہ اشیا سے مکمل پرہیز کیا جائے تاکہ وائرس کے مزید پھیلاؤ کو روکا جا سکے۔
