اسلام آباد (ڈیلی پاکستان آن لائن): 6 ستمبر یومِ دفاع و شہداء کے موقع پر پاکستان کی مسلح افواج نے ایک بار پھر تجدیدِ عزم کرتے ہوئے اس بات کا اعادہ کیا ہے کہ وہ ملک کی خودمختاری، جغرافیائی سالمیت اور قومی مفادات کے دفاع کے لیے ہم وقت تیار ہیں۔ 61 ویں یومِ دفاع کے موقع پر آئی ایس پی آر کی جانب سے جاری کردہ مشترکہ بیان میں عسکری قیادت نے شہداء اور غازیوں کو زبردست خراجِ عقیدت پیش کیا ہے۔
عسکری قیادت کا مشترکہ پیغام: بیان کے مطابق چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، چیف آف دی نیول اسٹاف ایڈمرل نوید اشرف، چیف آف دی ایئر اسٹاف ایئر چیف مارشل ظہیر احمد بابر سدھو، کمانڈر نیشنل اسٹریٹجک کمانڈ جنرل سید عامر رضا اور پاک فوج کے تمام طبقات نے 1965 کی جنگ کے شہداء کی لازوال قربانیوں کو یاد کیا۔ عسکری قیادت کا کہنا تھا کہ 6 ستمبر قومی اتحاد، بے مثال بہادری اور غیر متزلزل عزم کی علامت ہے، اور میدانِ جنگ، فضاؤں اور سمندروں میں محافظوں کی نسلوں نے جانوں کا نذرانہ دے کر ثابت کیا کہ اس مٹی کی حفاظت کرنا ہماری اولین ذمہ داری ہے۔
امن کے خواہاں ہیں لیکن جارحیت کا منہ توڑ جواب دیا جائے گا: آئی ایس پی آر کے اعلامیے میں واضح کیا گیا ہے کہ پاکستان خطے میں امن، استحکام اور پرامن بقائے باہمی پر یقین رکھتا ہے، تاہم ہمارے اس پرامن عزم کو ہرگز کمزوری نہ سمجھا جائے۔ پاکستان کے خلاف کسی بھی قسم کی مس ایڈونچر یا جارحیت کا فوری، بھرپور اور فیصلہ کن جواب دیا جائے گا۔ افواجِ پاکستان نے شہداء کے لواحقین کے صبر و استقامت کو بھی سراہا اور اس عزم کا اعادہ کیا کہ غازیوں اور شہداء کا خون رائیگاں نہیں جانے دیا جائے گا اور قوم کے شانہ بشانہ ہر خطرے کا ڈٹ کر مقابلہ کیا جائے گا
