پاکستان تحریک انصاف (پی ٹی آئی) کا لانگ مارچ ملتوی کرنے کی وجہ سامنے آگئی ہے۔
اے آر وائی نیوز کے مطابق ذرائع کا کہنا ہے کہ پی ٹی آئی کا لانگ مارچ 5 اکتوبر تک ملتوی کردیا ہے جس کا اعلان پارٹی چیئرمین کی جانب سے کل کیا جائے گا۔
ذرائع کا کہنا ہے کہ لانگ مارچ مؤخر کرنے کا فیصلہ سیاسی کمیٹی اجلاس میں کیا گیا ہے۔
پی ٹی آئی کی جانب سے دوسرا اجلاس آج رات ہوگا جس میں باضابطہ طور پر محمود اچکزئی، راجہ ناصر عباس کو اعتماد میں لینے کے بعد وزیر اعلیٰ سہیل آفریدی جنہوں نے 27 ستمبر کو لانگ مارچ کی کال دی تھی وہ اسے 5 اکتوبر کو موخر کرنے کا اعلان کریں گے۔
سہیل آفریدی کا کہنا تھا کہ ہماری سیاسی کمیٹی کا اجلاس جاری ہے ہوسکتا ہے کہ ہم آپ کو دوبارہ پریس کانفرنس کے لیے مدعو کریں۔
ذرائع کے مطابق گزشتہ شام اجلاس ہوا جس میں بیرسٹر گوہر، مرکزی رہنما، اسد قیصر، جنید اکبر، سہیل آفریدی چاروں بڑے اس بات پر متفق تھے کہ ہمیں یہ مارچ فی الحال موخر کرنا چاہیے اور کچھ دنوں کے لیے وقت دے کر تیاری کرنی چاہیے۔
ذرائع کا کہنا تھا کہ پی ٹی آئی کے پاس لانگ مارچ کے لیے فنانشل سپورٹ فراہم نہیں ہوئی تھی جس کی ان کو توقع تھی۔



